Stigatalvan sigur, at tað eru grannaliðini Víkingur og ÍF, sum hava møguleika at stinga seg fram millum tey fremstu, nú tá ið toppliðini bæði, HB og KÍ, fara at dystast í Klaksvík.
Víkinga avrikið var einki at reypa av, tá ið eysturoyingarnir fyri aðru ferð í ár vórðu sendir úr Gundadali við stórtapi. Hesa ferð var tað 3-0 ímóti HB. Geza Turi er leikbannaður, nú 07 Vestur kemur at vitja. Tað er møguleiki fyri, at 16 ára gamli Elias Rasmussen fyri fyrstu ferð nakrantíð fer at verja Víkinga málið í bestu deildini.
07 Vestur legði sunnudagin rygg til 3-0 heimatap ímóti B36. Í Gundadali megnaði 07 Vestur herfyri málleysan javnleik ímóti HB. Útgangsstøðið ímóti Víkingi verður eins verjukent, sum tað var ímóti HB. Hesa ferð verður Tehé Aristidé ikki í miðverjuni. Hann er leikbannaður eftir reyða kortið ímóti B36.
Hol á miðvøllinum
Fuglfirðingar fóru longu í gjárkvøldið um Suðuroyarfjørð. Fyrsta bríkslið við Stórá verður klokkan 13.30. At tað verður spælt so tíðliga ber við sær, at ÍF ferðalagið sleppur frá at liggja nátt tvær ferðir sunnanfjørðs.
ÍF vísti sunnudagin góðan moral, tá ið 0-3 varð vent til 3-3 ímóti KÍ. Tað kemur dátt við, at stýrimaðurin á miðvøllinum, Høgni Madsen, er leikbannaður. Alaksandar Jovevic er ivasamur, og Jákup Johansen er framvegis skaddur. Bogi Reinert Petersen hevur orsaka av skaða ikki spælt seinastu ferðirnar, og tað er ivasamt, um hann verður førur fyri at spæla ídag.
Hjá TB er týdningarmiklasti álopsspælarin, Poul Ingason, leikbannaður eftir tvey gul kort í Streymnesi, og miðvallarin Ragnar Tausen er ivasamur. Orsaka av skaða spældi hann ikki við í Streymnesi, tá ið TB vísti framúr moral og tvær ferðir svaraði aftur, so úrslitið varð 2-2.
Kroystir argjamenn
Hóast framvegis skaðaplágað so megnaði B36 3-0 sigur í Sørvági. Í kvøld verður grannauppgerð í Gundadali ímóti AB, sum framvegis er stigaleyst, og sum hevur málmunin 5-14. Sjálvandi vóru argjamenn harmir, tá ið teir ímóti NSÍ á Argjum mistu javnleikin í síðstu sekundunum.
AB hevur verið illa skaðaplágað, og soleiðis er tað framvegis. Hjá B36 er Súni Olsen fyri aðru og síðstu ferð í hesum umfarinum leikbannaður. Jákup á Borg er framvegis skaddur, meðan tað verður roknað við, at vongverjin í vinstru, Símun Joensen, verður førur fyri at spæla , eftir at hann í Sørvági sat skaddur á beinkinum.
Eftir seks umfør er AB fimm stig frá bjargingini. Tað kann laga seg soleiðis í kvøld, at fjarstøðan verður uppaftur meiri enn so.
Seks stig
FM vinnararnir í EB/Streymi spæla í Runavík. Higartil hevur tað bara eydnast FM vinnarunum at vinna eina ferð – í fyrsta umfari 4-0 á heimavølli ímóti 07 Vestur. Sunnudagin var tað vónbrot, at tað ikki eydnaðist at varðveita leiðslurnar ímóti TB. Arnbjørn Hansen, Brian Olsen og Marni Djurhuus eru framvegis skaddir.
Í NSÍ leguni var fagnaðurin stórur eftir 3-2 sigurin á Argjum. Venjarin, Abraham Løkin, ásannaði, at talan hevði ikki verið um sannførandi avrik, og at tað ikki minst er dygd at vinna sovornar uppgerðir. Einar Tróndargjógv er tøkur aftur eftir leikbannið á Argjum. Málverjin, Kristian Joensen, er plágaður av skaða í lærkrikanum, men tað verður roknað við, at hann fer at spæla ímóti EB/Streymi.
Um tað eydnast EB/Streymi at vinna, so verða meistararnir á sama stigatali sum NSÍ. Um gestirnir einki fáa burturúr, so verður frástøðan fram til miðjuna á talvuni óhugaliga stór!
