Fríggjadagin 31. januar lat ein vøkur og áhugaverd framsýning upp í Fípuni í SMS.
Hon ber heitið: “Vakurt farvæl við blómuheilsan”. Tað er lærlingurin Maria Deku, sum er byrjað við sínum sveinastykki, og evnið er “Prýði til jarðarferð”.
Umframt at sýna fram sítt skapandi kynstur er eitt endamál við framsýningi eisini at varpa ljós á tær tænastur, ið blómuhandilin Fípan veitir sínum viðskiftafólkum.
Framsýningin sýnir teir klassisku litirnar reytt og hvítt til og við mánadagin 3. februar.
Týsdagin 4. februar verður hildið fram við øðrum litum við heitinum “Nýsummar við lavendel og hvítum” Eitt, ið tú beinan vegin leggur til merkis er, at vakurleiki, nærlagni og góðska eru í hásæti, og tað er veruliga ein fragd at skoða hesi prýði.
Maria leggur dent á, at tað er av alstórum týdningi at ganga ynskjunum hjá kundanum á møti, tá hon ger eitt tílíkt prýði, og at blómur og litir skulu spegla lyndið og lívið hjá tí persóni, ið prýðið er ætlað til. Framsýningin verður opin til og við hósdagin 6. februar, og Maria býður øllum vælkomnum at vitja.
