Soleiðis skrivar Magni Blástein, sum skipar fyri fiskiferðum við ferðafólki.
– Eg misti 60 prosent av søluni av fiskiferðum í fjør og hevði mín fyritøka havt skuld, so var eg noyddur at gevast, skrivar hann í uppslag á Facebook.
Hann heldur, at hjálparpakkin átti at tikið støði í mistari inntøku og endurgoldið t. d. 30 prosent, tí landið bleiv so at siga stongt helvtina av sesongini.
– Um vit, sum hava smáar ferðavinnufyritøkur mugu gevast, so verða færri upplivingar til ferðafólk, og tá gerast Føroyar minni spennandi sum ferðamál.
Fríggjadagin boðaði Gist & Vist, sum eigur Hotel Føroyar, Hotel Tórshavn, Hotel Vágar, Koks og nógvar aðrar matstovur, frá, at undirskotið var 12,8 milliónir krónur við almenna stuðlinum upp á 10,2 milliónir. Tað vil siga, at hallið er 23 milliónir krónur í mun til eitt yvirskot í 2019 upp á 13,1 millión krónur. Tað er ein munur upp á 36,9 milliónir.
