Hallur Hansson var á vøllinum allan dystin tá lið hansara, AC Horsens spældi áttandapartsfinalu í donsku steypakappingini móti AGF á útivølli í Århus.
Leingi sá tað út til, at dysturin fór til longdar leiktíð, men fáar minuttir undan leikloki skoraði Frederik Tingager sigursmálið fyri AGF til 1-0, ið gjørdist endaliga úrslitið av dystinum. Kjartan Finnbogason og Casper Tengstedt høvdu møguleikar at javna fyri AC Horsens, men vóru ikki nóg neyvir.
Tíðliga í fyrra hálvleiki hildu teir í Horsens, at teir áttu brotsspark tá Patrick Mortensen hjá AGF nam bóltin við hondini í egnum brotsteigi, men dómarin sá ikki hendingina.
AGF hevur sostatt vunnið seg í fjórðingsfinalurnar í donsku steypakappingini.
Hallur Hansson og liðfelagarnir í AC Horsens hava bara ein dyst eftir í hesum árinum, og tað er ein dystur í superliguni móti Lyngby á útivølli, ið verður leiktur komandi sunnudag.
HER BER TIL AT SÍGGJA HÆDDARPUNKTINI FRÁ ÁTTANDAPARTSFINALUNI MILLUM AGF OG AC HORSENS:
##med2##
