Ígjár fekk Hákun West av Teigum veruliga víst sítt virðið fyri Füchse Berlin í útidysti í týsku bundesliguni móti Bergischer.
Füchse Berlin vann dystin 34-30, og Hákun skoraði fimm mál upp á fimm málroyndir. Hákun gjørdist saman við Fabian Wiede næstbesti málskjúttin hjá Füchse Berlin. Toppskjútti hjá Füchse Berlin var Lasse Andersson við seks málum.
Füchse Berlin var á odda 17-12 á steðginum.
HER ber til at síggja ein samandrátt av dystinum. Á samandráttinum sæst eisini eitt gott mál hjá Hákuni. Videobrotið sæst undir yvirskriftini á greinini hjá Kicker, ið er størsti ítróttarmiðilin í Týsklandi.
Füchse Berlin er næstfremst í bundesliguni við átta stigum fyri fýra dystir.
Melsungen, ið vann 35-30 (13-13) á liðnum hjá Eliasi Ellefsen á Skipagøtu í Kiel er fremst í bundesliguni, eisini við átta stigum, men við betri málmuni enn Hákun og liðfelagarnir.
THW Kiel er nummar fimm í deildini við seks stigum fyri fimm dystir.
