Í sambandi við kappingina Ungt Virki var herfyri sølustevna í SMS í Havn. Hendan kapping gav sum vinning ískoyti at fara til stevnuna Young Enterprise International Trade Fair, sum júst hevur verið í Stavanger.
Unga virkið »Leia« vann og fór til Stavanger, har tey vunnu eina virðisløn fyri ta mest umhvørvisvinarligu vøruna.
113 virki tóku lut á sølustevnuni í Stavanger, og 20.000 fólk vitjaðu stevnuna.
Í dag er so árskappingin millum tey fýra ungu virkini á Føroya Handilsskúla á Kambsdali. Vinnarin tekur lut í Danmarksmeistarakappingini í Keypmannahavn 20. og 21. apríl.
Vinningurin, sum Føroya Handilsskúli gevur, fevnir um ferðaútreiðslur fyri eitt virki og ein lærara aftur og fram til DM.
Vinnarin í Keypmannahavn kann fara til Moskva 8. - 12. august til Young Enterprise International Competition.
Aftur í ár hava fyrireikararnir fingið Nis Kaper Buch, sum er stjóri í Finansrådet, til høvuðsdómara. Hinir dómararnir eru Rógvi Róin frá SMS, Ólavur Jensen úr Føroya Sparikassa og Marita Rasmussen úr Vinnuhúsinum. Lærarar eru Maria Gregersen á Kambsdali og Martha Weihe Dalsgaard úr Havn. Virkini eru ÁBBA (fløga), HAMMB (gongutúrar), Leia (Ullteppi) og UNG-T (T-shirts við kult-tekningum).
