Tilsamans 379 politiskir fangar verða leyslatnir í Venezuela, tá teir fáa amnesti í næstum.
Tað upplýsir Jorge Arreaza, umboð fyri tjóðartingið í landinum, sambært tíðindastovuni AFP.
Fráboðanin kemur eftir at tjóðartingið hósdagin samtykti náðilóg.
- Áheitanir eru lagdar frá ákæruvaldinum til dómstólarnar um at veita náði tilsamans 379 fólkum, segði Jorge Arreaza í sjónvarpsrøðu.
Sambært tíðindastovuni Reuters er Arreaza leiðari fyri eini kommissión, sum hevur ábyrgdina av at seta nýggju náðilógina í verk.
Hann legði afturat, at fangarnir verða leyslatnir í eitt tíðarskeið, sum røkkur til leygarmorgunin lokala tíð.
Nýliga samtykta náðilógin er miðdepilin í nýskipanum, sum virkandi forsetin Delcy Rodríguez hevur tikið stig til, síðani amerikanskar serdeildir hertóku leiðaran í landinum, Nicolás Maduro, í venezuelanska høvuðsstaðnum, Caracas, 3. januar.
Rodríguez roynir at møta krøvum frá stjórnini hjá amerikanska forsetanum Donald Trump um at normalisera viðurskiftini millum londini eftir fleiri ár við spenningi.
Mannarættindafelagsskapir hava funnist at náðilógini fyri ikki at vera nóg umfatandi.
Lógin gevur náðiloyvi fyri luttøku í politiskum mótmælum og tí, sum verður lýst sum harðligar gerðir, sum fóru fram undir eini stuttari kollveltingarroynd í 2002 móti fyrrverandi leiðaranum Hugo Chávez.
Lógin fevnir eisini um mótmælisgongur ella val í ávísum mánaðum í 2004, 2007, 2009, 2013, 2014, 2017, 2019, 2023, 2024 og 2025.
Fólk, sum eru dømd fyri tað, sum verður lýst sum hernaðarlig uppreistur í 2019, fáa tó ikki náði.
Lógin gevur heldur ikki náði til fólk, sum eru dømd fyri mannarættindabrot, krígsbrotsverk, morð, rúsevnahandil og korruptión.
/Ritzau/
