SPECIAL OLYMPICS
Special Olympics í Rom er av og Føroyar hava fingið nøkur framúr góð úrslit. Ikki færri enn seks heiðursmerki eru komin í hús, og tí kunnu luttakararnir við góða samvitsku njóta endahátíðina, sum verður í kvøld.
Apolonia tvær gullmedaljur
Apolonia var heiðursmerkjaslúkurin í føroyska hópinum. Í svimjing vann hon gull í 50 metur firvald og 50 metur bringu, umframt at hon eisini vann silvur saman við Ragnvaldi í stafettini.
Ragnvaldur sjálvur vann eisini gull í 200 metur frísvimjing, og eina silvurmedalju ognaði hann sær eisini í 100 metur bringu.
Bronsumedaljuna fekk Kristian Martin í kúlukasti. Hann varð annars diskvalifiseraður, men henda avgerð varð tikin upp til viðgerðar og vísti tað seg, at vera ein skeiv avgerð, og tí var Kristian Martin við aftur í kappingini.
Tað fegnaðust tey í føroyska hópinum um, og Kristian Martin kvitteraði við at skaffa føroyska hópinum eina bronsumedalju, soleiðis at liðið sleppur heim við metalli av øllum slag.
