Adrian R. Justinussen var á vøllinum í 80 minuttir, og inn fyri hann í 80. minutti kom Poul Kallsberg, ið aftur fekk spælitíð fyri Hillerød í kvøld.
Hillerød vann í útidysti í næstbestu donsku fótbóltsdeildini ein góðan 2-1 sigur á Lyngby, ið hevur nógvar superligu-royndir.
Lyngby legði seg á odda í 13. minutti, men eitt korter seinni fann Victor Dedes Adrian við einari framúrskarandi sending. Adrian tók av og stútaði bóltin í netið til 1-1. Talan var um triðja málið hjá Adrian í hesum kappingarárinum.
Lucas Bøje-Lassen skoraði sigursmálið hjá Hillerød, tá 12 minuttir vóru eftir av vanligu leiktíðini.
Hillerød er fjórðfremst í deildini við 10 stigum fyri seks dystir. Teir eru tvey stig aftanfyri oddaliðið, Esbjerg sum hevur 12 stig.
Komandi leygardag klokkan 13 hevur Hillerød heimadyst. Tá kemur HB Køge á vitjan.
