Í vikuni var vinnu- og mentanarnevndin í Vága kommunu á vitjan á Snarfrost í Miðvági.
- Í 2017 skifti Snarfrost eigarar, tá Henriksen-familjan í Sørvági keypti bygningarnar á kaiøkinum í Miðvági. Síðan tá eru nógvar ábøtur og dagføringar gjørdar á Snarfrost.
Soleiðis siga tey í Vága kommunu í dag.
- Snarfrost tekur dagliga ímóti útróðrarfiski, umframt at línubátar, trolbátar og skipini, sum felagið eigur, eisini landa til Snarfrost.
Meðan vinnu- og mentanarnevndin var á vitjan, varð makrelur arbeiddur á virkinum. Snarfrost tekur hesar dagarnar ímóti makreli frá Vesturbúgvanum.
Tummas Henriksen, stjóri, vísti nevndini runt á virkinum og greiddi frá, hvat virksemi er á virkinum.
- Hann greiddi eisini frá um framtíðarætlanir, og at seinni í ár er ætlanin at byggja út og skera til flak á virkinum.
Skipini, sum felagið Snarfrost eigur í, eru Vesturvarði, Katrin Jóhanna, Vesturbúgvin og Norðfinnur.
- Umframt tað, eiga nøkur av fólkunum handan Snarfrost eisini Brestir, og seinni í ár kemur nýggja skipið hjá felagnum - Vesturleiki - til landið, verður lagt aftrat.
Í vinnu- og mentanarnevndini í Vága kommunu sita Jóanis Albert Nielsen, formaður, Beinta Gudmundsen, Ingi Wiberg, Dánial A. Hansen og Jónhard Selfoss.
