Áki D. Samuelsen bleiv í kvøld søguligur málskjútti, tá Mjällby á Strandvallen í Hällevik spældi fyrsta evropeiska dystin nakrantíð.
Tað eydnaðist Mjällby at fáa eitt gott útgangsstøðið móti Lincoln Red Imps við 3-0 sigri. Áki syrgdi fyri fyrsta og øðrum málunum, ið eru fyrstu málini hjá Mjällby í evropeiskum dysti.
Jacob Bergström syrgdi fyri triðja málinum. Tað vóru bert leiktir 31 minuttir av dystinum tá.
Áki skoraði fyrra málið í 18. minutti við einum góðum og væl plasseraðum skoti úr 14-15 metrum. Seks minuttir seinni spældi Jesper Gustavsson Áka leysan, ið einsamallur við málverjanum ikki sveik álitið.
Tíverri brendi Áki í 66. minutti eitt brotsspark, ið kundi havt tryggjað Mjällby eina 4-0 leiðslu, og Áka eitt hattrick í fyrsta evropeiska dystinum hjá Mjällby.
Tíverri fekk Martin Agnarsson ikki spælitíð fyri Mjällby á hesum sinni.
Returdysturin verður leiktur komandi týsdag klokkan 17 niðri í øllum hitanum í Gibraltar.
