Tøknifyritøkan Apple kom í dag við eini røð av nýggjum vørum, eitt nú eina nýggja iPhone Air, sum er munandi tynri enn undanfarnar telefonir frá fyritøkuni.
Nýggja iPhone er 5,6 millimetrar tunn. Hetta merkir, at bert eitt eSim-kort virkar. Tað verður ikki møguligt at seta fysiskt simkort í telefonina.
Torben Vognsen er ritstjóri á tøknimiðlinum input.dk og var til staðar á sýningini á høvuðssætinum hjá Apple, Apple Park, sunnan fyri San Fransisco.
Hann helt nýggju iPhone Air í hondunum og heldur hana vera "órealistiskt tunna".
- Tað mest áhugaverda við henni er, at hon peikar móti tí, sum kemur næsta ár, sum helst verða telefonir sum kunnu foldast. Tey mugu gera tær sera tunnar, um tær skulu kunna foldst, og tað er tað, sum iPhone Air peikar ímóti, sigur blaðstjórin.
Hinvegin setur tunna telefonin eitt mark fyri støddini á battarínum. Torben Vognsen væntar, at battarílívið verður "lutfalsliga ógvusligt".
Apple hevur ikki upplýst nakað um støddina á battarínum í nýggju telefonini, meðan um ryktini sambært ritstjóranum eru sonn, so fer battaríið at hava minni orku enn battaríið í vanligari iPhone 17.
- Hetta merkir, at tað skal dríva ein størri skíggja, men við einum minni battaríi. Og tað verður hart á battarínum, sigur Vognsen.
Hansara uppskot er, at telefonin í fyrsta umfari kann koyra frá morgni til klokkan sjey ella átta um kvøldið, áðrenn hon skal løðast.
- Og so eftir einum ári, tá tú hevur installerað nógvar appir og battaríið er vorðið eitt sindur slitið, rennur tú runt eftir døgurða og leitar eftir einum løðara, sigur blaðstjórin frá input.dk.
Millum valfríu útgerðina til nýggju iPhone Air er eitt eyka battarí, sum kann setast aftan á telefonina og skjótt løða hana, tá battaríið er lágt.
Nýggja iPhone Air fer at kosta 999 dollarar í USA. Í Danmark verður prísurin 8999 krónur. Eyka battaríið kostar 849 krónur.
Apple legði eisini fram fleiri útgávur av nýggjari iPhone 17. Harímillum iPhone 17 Pro og Max.
Harumframt komu nýggjar oyratelefonir, Airpods Pro 3, á marknaðin. Nýggju oyratelefonirnar kunnu millum annað umseta beinleiðis sum ein av nýggju funkunum.
Hetta merkir, at meðan tú sigur okkurt, kanst tú fáa tað týtt. Um tvey fólk sita yvirav hvørjum øðrum og tosa á ymiskum málum, so týða Airpods Pro 3, meðan hin sigur okkurt.
Sambært Apple hava nýggju Airpodsini munandi betri ljóðminking og eru sveittamótstøðuførar.
Airpodsini verða at fáa frá 19. september og kosta 249 dollarar í USA, meðan prísurin í Danmark er 1999 krónur.
Eisini vórðu nýggjar útgávur avdúkaðar, eitt nú nýggjar útgávur av urum hjá Apple, Apple Watches. Nýggju urini kunnu millum annað máta blóðtrýstið hjá brúkaranum.
/Ritzau/
