Tað skrivar grønlendski miðilin Sermitsiaq.
Danska Ferðslustýrið hevur sent eitt uppskot til nýggjar reglur til hoyringar. Sambært uppskotinum skulu motorakfør framyvir sýnast á eftirlitsstøðum við vegirnar, har sýnsfólk frá Ferðslustýrinum fara at kanna bilarnar.
Væntað verður, at nýggja skipanin kemur í gildi um ársskiftið.
Arbeitt hevur verið við málinum í fleiri ár. Í 2025 gjørdu danski samferðslumálaráðharrin og grønlendski landsstýrismaðurin fyri bústaðir, undirstøðukervi og útjaðaraøki avtalu um at fáa eina skipan upp at standa.
Longu í 2022 vóru grønlendskir og danskir myndugleikar samdir um, at tørvur var á regluligum bilsýni.
Síðst bilsýn varð framt í Grønlandi var í 1999, tá starvsfólk úr táverandi Statens Bilinspektion ferðaðust kring landið og sýnaðu bilar.
Síðani hava fleiri royndir verið gjørdar at fáa eina nýggja skipan í lag. Millum annað fall eitt lógaruppskot í 2012 burtur eftir mótmæli frá vinnulívinum.
Í uppskotinum verður ikki ásett, hvussu ofta bilarnir skulu sýnast. Í Føroyum og í Danmark verða vanligir persónbilar sýnaðir fyrstu ferð eftir fýra ár og síðani annaðhvørt ár.
Hóast einki regluligt bilsýn hevur verið í Grønlandi síðani 1999, hevur løgreglan sambært grønlendsku ferðslulógini framvegis havt heimild til at kanna, um bilar eru í forsvarligum standi.
