Heimsins stríð móti korruptión gongur ikki framá. Í staðin gongur heldur hinvegin.
Tað sæst í ársfrágreiðingini frá felagsskapinum Transparency International, sum hevur mátað, hvussu stór fatanin av korruptión er í fleiri londum kring heimin.
Síðani 2012 hava bert 31 lond betrað um stigatalvuna til positivt, meðan 50 hava upplivað eina afturgongd í stigatalinum. 100 lond eru á sama støði fyri 2025 sum í 2012.
Merkisvert er, at stigatalið hjá Svøríki til dømis er fallið úr 88 í 2012 niður í 80 í 2025, og Nýsæland er fallið úr 90 niður í 81 í sama tíðarskeiði.
Danmark hevði eina lítla afturgongd í stigatalinum úr 90 til 89 í mun til í fjør, men er framvegis landið við minst korruptión í almenna geiranum í 2025 áttanda árið á rað.
- Afturgongdin skulu vit isolerað fyri Danmark ikki tað í so stórum álvara, sigur Jesper Olsen, formaður í Transparency International Danmark.
Frágreiðingin byggir á spurnablaðssvar frá íleggjarum, vinnulívsfólkum, granskarum og marknaðargreinarum, sum meta um korruptión í almenna geiranum í teirra londum.
Lond fáa stig frá 1 til 100. Jú hægri stigið er, jú minni korruptur verður almenni geirin fataður at vera. Vísitalið fevnir ikki um privata geiran og kann tí ikki einans áseta, hvussu korrupt eitt land er, men virkar sum eitt støði.
- Tú skalt hyggja at langtíðargongdini og ikki bara ár fyri ár, um tú skalt hava eina sanna mynd av gongdini. Júst tí er afturgongdin globalt síðani 2012 áhugaverd, sigur Jesper Olsen.
Hóast tað kann vera freistandi at flagga við Dannebrog, tá tú lesur, at Danmark áttanda árið á rað er nevnt minst korrupta landið í heiminum, so mást tú minnast til at síggja tað í tí størru myndini, sambært Jesper Olsen.
- Tað er umráðandi at halda fast um, at hetta ikki er ein tjóðarbardagi í korruptión. Hóast tað er gott, at Danmark er í toppinum, so snýr frágreiðingin seg um meira enn hvør er nummar eitt.
- Tað áhugaverda er, at afturgongdin í stríðnum móti korruptión er ein alheims gongd, sum vit hava sæð í fleiri ár, sigur Jesper Olsen.
Frágreiðingin vísir fleiri áfallandi gongdir. 122 av teimum 182 londunum hava stig undir 50. Eitt stig undir 50 er prógv um, at korruptión er eitt týðiligt fyribrigdi í samfelagnum, sambært Jesper Olsen.
Fleiri fólkaræðislig lond eru eisini í afturgongd. Noreg, USA, Kanada og Frakland ganga øll aftur í tíðarskeiðnum 2012-2025.
- Fólkaræði eru eisini undir trýsti. Hóast vit hava havt væntanir um, at fólkaræði fóru at gera varandi batar, so síggja vit í veruleikanum, at tey eisini eru viðbrekin, sigur Jesper Olsen.
Støðan er serliga ring í USA, sum nú er á lægsta stigi, síðani kanningin fyrstu ferð varð almannakunngjørd í 1995.
- Tað gongur skjótt í USA hesi árini, og enn hava vit ikki sæð fulla ávirkanina av Trump-stjórnini, sigur formaðurin í Transparency International Danmark.
/Ritzau/
