Í tíggju minuttir leita tankarnir aftur til hitt minniliga brakið í Gundadali móti Russlandi. Við frálíkum frísparki hevur Róaldur Jacobsen lagt føroyska U-21 landsliðið á odda eftir bara seks minuttum. Upptaktin hevur eisini verið tann sama. Liðið hevur tapt stórt dystin frammanundan og nógvar broytingar eru á liðnum.
Í næstan tíggju minuttir megnar føroyska liðið at halda trýstinum frá serbisku mótstøðuni, sum minnur um russisku mótstøðuni á sinni. Teir eru teknist væl fyri, skjótir á fótum og ikki minst kropsliga sterkir.
Tá klokkan vísur, at vit hava spælt í eitt korter megnar U-21 landsliðið ikki at standa ímóti meir.
Skrædl í ein hálvan tíma
Komandi hálvi tímin minnur tó mest um dystin móti Norðurírlandi. Føroyska liðið megnar als ikki at steðga serbisku mótstøðuni, sum ferð eftir ferð kemur til málmøguleikar. Eftir eitt av hesum álopinum kemur Nemanja Kojic at standa leysur langt inni í okkara brotsteigi og stútar bóltin hart í málið handan Kristian Joensen.
Tað ganga bara tveir minuttir, so er aftur gali í føroysku verjuni. Hornaspark kemur innfyri og Matija Nastasic er hægstur og so er Serbia á odda.
Trýstið heldur fram
Nú vónaði føroyska liðið helst, at trýstið á føroyska málið fór at minka, men so var ikki. Tvær ferðir er nær við at Serbia økir, áðrenn málið til 3-1 kemur. Hesa ferð er talan um framúr mál, sum Darko Lazovic skorar. Staddur í vinstru síðu rekur hann inn í brotsteigin og sendur bóltin í handara mál horn.
Fimm minuttir fyri hálvleik verður serbiska yvirtakið staðfest, tá Luka Milunovic økir til 4-1 eftir innlegg. Ein næstan fullsettur Gradski leikvøllur hevur verið vitni til serbiska yvirvág í 40 minuttir, sum er umsett til fýra mál. Men tey eru eisini komin at kenna Róald Jacobsen.
Góður seinni hálvleikur
Í seinna hálvleiki kemur føroyska liðið væl betri við og kemur til fleiri góðar málmøguleikar. Dánjal á Lakjuni kemur inn fyri Klæmint Olsen. Fleiri ferðir eydnast at spæla seg úr serbiska trýstinum og kom til góðar støður. Serliga í høgrusíðu kom fleiri innlegg, men serbiska verjan er sterk og ruddar vekk.
Bestu støðuna kemur Gunnar Zachariasen í, tá serbar senda eitt málspark beint í beinini á honum. Verjan er tó skjót aftur og hart kroystur eydnast honum ikki at fáa skot á málið.
Keðiligt fimta mál
4-1 er ríkiligt hjá serbum at verða á odda, men stutt fyri tíð økit Darko Lazovic til 5-1, sum ikki sær eins pent út. Málið setti líka sum eina striku undir styrkina hjá serbiska U-21 landsliðnum, tá teir hava ein góðan dag.
U-21 landsliðið hevur nú spælt tveir útidystir á rað og báðir eru endaðir við greiðum ósigrum. Komandi uppgávan er í Aalborg móti Danmark, vónandi reisa dreingirnir seg til tann dystin.
