Inntil fyri heilt stuttum sá tað út til, at spurningurin um at flyta upp í bestu deildina fór at verða avgreiddur friðarliga skilt á tann hátt, at FC Suðuroy var upplagdur favorittur at flyta beinleiðis upp, og at eitt annað felag fór at fáa møguleika at spæla um pláss í bestu deildini ímóti tí, sum fer at enda næstaftast í bestu deildini.
Í kvøld vendir tað heilt øðrvísi, enn tað hevur gjørt.
Ein orsøk er, at B36 er steðgað upp. Teir næstbestu hjá B36 vóru leingi á odda og so á heiðursmerkjaplássi. Í gjárkvøldið tapti B36 2-0 í Gundadali ímóti teimum næstbestu hjá KÍ, sum hava verið í stórum vanda fyri at flyta niður, men sum nú eru við at koma sær upp á turt.
Í dag tapti toppliðið FC Suðuroy, sum við viðhaldsskara var á Sandi. B71 vann 1-0 við máli, sum varð skorað í 62. minutti.
Við langari sending úr heimaverjuni varð bólturin lagdur fram til Eduardo Coimbra, sum sneiddi seg leysan og setti bóltin framvið Rasmusi Olsen í FC Suðuroy málinum.
Sigurin ber við sær, at B71 nú er á fjórða plássi við 37 stigum. Sandoyingar hava ikki tapt síðani 28. juni, tá ið teir taptu 2-1 á útivølli ímóti Víkingi. Síðani hava teir vunnið 19 stig í 9 dystum.
Tapið hjá FC Suðuroy í dag var tað fyrsta síðani 18. mai, tá ið FC Suðuroy tapti 3-1 á útivølli ímóti Víkingi. Síðani var úrtøkan 23 stig í 11 dystum.
FC Suðuroy og Víkingur, sum í morgin fær vitjan av botnliðnum HB, hava 39 stig, B36 og B71 hava 37 stig, TB hevur 35 stig, og AB hevur 34 stig. Seinnapartin í morgin fer AB at spæla á heimavølli ímóti FC Hoyvík, sum er næstaftast.
Í dag fekk TB av álvara um endan í kappingini um at flyta upp, tá ið tað í Trongisvági endaði við 2-1 heimasigri ímóti teimum næstbestu hjá NSÍ.
Samudeen Musah í 7. minutti, og Eyðtór Eyðsteinsson í 58. minutti løgdu TB á odda 2-0, og Kári Hansen minkaði um munin til 2-1 í 66. minutti.
| Víkingur | 22 | 11 | 6 | 5 | 50 | 28 | 39 |
| FC Suðuroy | 22 | 10 | 9 | 3 | 45 | 28 | 39 |
| B36 | 22 | 10 | 7 | 5 | 41 | 29 | 37 |
| B71 | 23 | 10 | 7 | 6 | 34 | 26 | 37 |
| TB | 23 | 8 | 11 | 4 | 32 | 21 | 35 |
| AB | 22 | 9 | 7 | 6 | 41 | 24 | 34 |
| NSÍ | 23 | 7 | 7 | 9 | 33 | 39 | 28 |
| KÍ | 23 | 7 | 3 | 13 | 24 | 45 | 24 |
| FC Hoyvík | 22 | 4 | 5 | 13 | 17 | 43 | 17 |
| HB | 22 | 2 | 6 | 14 | 23 | 57 | 12 |
Sunnudagin
Víkingur – HB: Jákup Øssursson Mohr kl. 15.00
AB – FC Hoyvík: Leivur Zachariassen kl. 15.00
24. umfar
Fríggjadagin 27. september
NSÍ – KÍ: Heini Ziskason Viðoy
Leygardagin 28. september
HB – B36: Rani Andrasson Skaalum
B71 – AB: Leivur Zachariassen
Sunnudagin 29. september
FC Hoyvík – Víkingur: Alex Troleis
FC Suðuroy - TB: Høgni Madsen
