Kanning, sum Fólkaheilsuráðið hevur gjørt, vísir, at ung halda seg hava verri sálarheilsu enn eldri, og ung í Føroyum hava verri sálarheilsu enn ung í hinum Norðurlondunum.
– Hetta er eitt globalt fenomen, sum vit eisini síggja aftur í Føroyum, sigur Magni Mohr, formaður í Fólkaheilsuráðnum í Degi og Viku í kvøld.
Ein av orsøkunum til strongd og tyngd hjá hjá føroyskum ungdómi er fíggjarstøða og bústaðarstøðan hjá teimum ungu.
– Tað spælir inn, um ein hevur trupulleikar av fíggjarviðurskiftunum - sum tey ungu hava í størri mun enn tey eldri - umframt bústaðartrupulleikar, sigur hann.
– Vit síggja eisini, at samanhangur er millum ringa sálarheilsu og ringar rørslu- og kostvanar, at roykja, stóra heilivágsnýtslu og ringan svøvn. Hevur tú tað ringt sálarliga hongur tað saman við nógvum av hinum faktorunum, sum vit seta í samband við at hava góða heilsustøðu, sigur hann.
– Vit kunnu staðfesta, at vit hava ein breiðan fólkaheilsutrupulleika, sigur Magni Mohr eisini.
