Ferðmátingar vísa, at nógvir bilførarar koyra munandi skjótari enn loyvt við innkoyringina til Sands.
Á einum mátingarstaði, har hámarksferðin er 50 kilometrar um tíman, vísti mátingin, at 85 prosent av bilunum koyrdu 64 kilometrar um tíman ella minni. Hinvegin koyrdu 15 prosent skjótari enn 64 kilometrar um tíman.
Tað merkir, at 85 prosent av bilunum koyrdu 64 kilometrar um tíman ella minni, meðan 15 prosent koyrdu skjótari.
Hetta stendur í ferðslutrygdarætlanini fyri kommunalu vegirnar og landsvegirnar í Sands kommunu fyri árini 2025–2029.
Mátingin varð gjørd við innkoyringina til bygdina á Sondum. Sambært ætlanini koyra bæði privatbilar og lastbilar ov skjótt oman brekkuna og seta ofta ikki ferðina niður, fyrr enn komið er oman á slætt.
Støðan verður mett at vera serliga óheppin, tí eingin gongubreyt er á vegastrekkinum. Gongufólk, súkklufólk og akfør ferðast tí á sama vegi.
Næstan dagligar yvirhálingar
Á einum borgarafundi varð eisini ført fram, at bilar næstan dagliga yvirhála nærindis vegamótinum til Sandabrekkuna.
Tað kann skapa vandamiklar støður, um ein bilur ætlar sær at snara til vinstru, samstundis sum ein annar bilur roynir at yvirhála.
Ferðslutrygdarætlanin mælir til, at hámarksferðin verður sett stigvíst niður úr 80 í 60 og síðani 50 kilometrar um tíman, áðrenn komið verður inn í bygdina.
Harumframt verður mælt til eina bremsioyggj, eitt sonevnt ferðportur og ein ferðgáa. Ein lítil rundkoyring við vegamótið til Sandabrekkuna verður nevnd sum ein møgulig og bíligari loysn.
Kostnaðurin fyri tiltøkini við innkoyringina verður fyribils mettur til umleið fýra milliónir krónur.
Ferðin ov høg fleiri staðni
Tilsamans vórðu tíggju ferðmátingar gjørdar í oktober 2024. Hvørt stað varð mált í sjey dagar.
Úrslitini vísa, at ferðin var ov høg á fleiri vegastrekkjum. Á kommunalu vegunum, har hámarksferðin er 30 kilometrar um tíman, var 85-prosentmarkið millum 34 og 44 kilometrar um tíman.
Á landsvegastrekkjunum við 50 kilometrum um tíman varð hann máldur til millum 56 og 64 kilometrar um tíman.
Sambært ferðslutrygdarætlanini er hetta álvarsamt, tí gongufólk, súkklufólk og bilar ofta noyðast at brúka somu vegabreyt.
