Føroyingauppgerð var í bestu íslendsku mansdeildini í hondbólti fyrr í dag.
KA við Allani Norðberg á liðnum tók móti ÍBV við Dánjali Ragnarssyni og Janusi Dam Djurhuus á liðnum.
Dysturin endaði við málríkum javnleiki 35-35. Toppskjúttin hjá KA, Einar Rafn Eiðsson javnaði til 35-35 við einum brotskasti í teimum allarseinastu sekundunum.
Í steðginum var KA á odda 19-16.
Allan skoraði tvey mál fyri KA. Janus skoraði fýra mál og Dánjal skoraði tvey mál fyri ÍBV.
Føroyski landsliðsmálverjin, Nicholas Satchwell hevði átta bjargingar í opnum spæli, og bjargaði eisini einum brotskasti.
Talan var um fyrsta dystin hjá ÍBV í deildini hetta kappingarárið, og annan dystin hjá KA hetta kappingarárið.
Komandi hóskvøld spælir KA á útivølli móti Hørði. Sama kvøld spælir ÍBV á heimavølli móti ÍR Reykjavík.
