Tá tú ikki hevur vitjað Vestmannaoyggjar í Íslandi áður, er Heimaey, sum er oyggin, har fólkið býr, eitt stórt upplivilsi. Tað er eisini eitt upplivilsi at síggja leivdirnar frá stóra eldgosinum í 1973, sum oyðilegði fleiri hundrað hús - og eisini hús, sum føroyingar áttu og búðu í.
Á ferðini í Vestmannaoyggjum hava vit vitjað eini føroysk hjún, sum hava búð í Vestmannaoyggjunum, heilt síðan tey funnu saman í oyggjunum og búsettust har. Tey høvdu akkurát bygd sær nýggj hús, tá eldgosið breyt út og oyðilegði húsini hjá teimum og mongum øðrum.
In.fo hevur verið á staðnum, har húsini stóðu, saman við føroyinginum, sum læt tey byggja. Í eina tíð eftir eldgosið búðu tey inni á meginlandinum, men fluttu skjótt útaftur í oyggjarnar. Í dag hava føroysku hjúnini heiðursmerkið á húsunum, sum vakrasta hús í býnum.
Vit hava verið runt oynna saman við føroyinginum, sum var sjómaður alt sítt arbeiðslív. Tey bæði fullu so væl til í Íslandi, at hóast bæði eru føroyingar, tosa tey íslendskt saman. Í dag hava tey lítið samband við føroyingar í Íslandi, og í oyggjunum búgva ikki so nógvir føroyingar longur.
