Fylgisveinamyndir benda á, at tað verða grivnar nýggjar hópgravir í landsynningsbýnum Mariupol í Ukraina, sum russiski forsetin, Vladimir Putin, í gjár segði var »fríaður«.
Men kanska kunnu fleiri sivil fólk sleppa úr býnum í dag.
Her er eitt yvirlit:
* Fylgisveinamyndir benda á nýggjar hópgravir í Mariupol.
Fylgisveinamyndir frá felagnum Maxar Technologies vísa fleiri langar veitir í ukrainska býnum Mariupol, sum annaðhvørt longu eru í brúki ella sum eftir øllum at døma verða brúktar sum gravir. Tað skrivar tíðindastovan Reuters.
* Humaniterar leiðir úr Mariupol er ein møguleiki í dag.
Ukrainski varaforsætisráðfrúan Iryna Veresjtjuk segði seint í gjárkvøldið, at tað er »ein møguleiki fyri«, at tað kunnu latast upp nýggjar humaniterar leiðir úr býnum Mariupol í dag. Tað skrivar tíðindastovan Reuters.
* Forsætisráðharri væntar skjótan sigur.
Stríðið ímóti russisku deildunum fær skjótt ein einda, og Ukraina kann standa sum vinnari av krígnum. Tað heldur forsætisráðharrin í Ukraina, Denys Sjmyhal, í eini samrøðu við amerikanska miðilin CNN.
* Moldova sendir boð eftir russiska sendiharranum.
Moldova hevur sent boð eftir russiska sendiharranum til samrøðu. Tað verður gjørt, eftir at ein russiskur kommandørur fyrr í gjár segði, at tað var týdningarmikið, at Russland fekk eftirlit við øllum suður og landssynnings Ukraina, so gerast kundi ein landbrúgv til útbrótaraøkið Transnistria í Moldova.
Uttanríkisráðharrin hjá Moldova er ógvuliga stúrin um útsøgnina, skkrivar tíðindastovan AFP.
* Eysturríki stuðlar ikki innflutningsbanni fyri russiskt gass.
Eysturríki stuðlar næstan øll revsitiltøk, sum eru sett í verk ímóti Russlandi í sambandi við kríggið. Tað er bara ikki galdandi, um tað verður sett eitt innflutningsbann á russiskt gass, sigur landsins fíggjarmálaráðharri, Magnus Brunner, við CNN.
– Tá eitt revsitiltak rakar teg sjálvan, meira enn tað rakar tann, sum revsitiltakið er ætlað at raka, so haldi eg ikki, at tað ger nakra nyttur, sigur hann.
/ritzau/
