Evropearar megnaðu ikki at fáa tamarhald á amerikanska forsetanum, Donald Trump, á fundinum hjá evropeisku leiðarunum í Hvítu Húsunum í gjár.
Í staðin takkaðu tey honum og smikraðu fyri honum.
Tað sigur næstformaðurin í russiska trygdarráðnum og fyrrverandi forsetin Dmitrij Medvedev á sosiala miðlinum X.
Her kallar hann eisini ukrainska forsetan sum ein klovn.
- Anti-russiska krígsførandi samgongan megnaði ikki at yvirhála Potus (Trump forseta, ritstj.) á heimavølli sínum. Evropa takkaði og smikraði fyri honum, skrivar Medvedev.
Sjey evropeiskir leiðarar og aðalskrivarin í NATO hittu í gjár í Hvítu Húsunum amerikanska forsetan og forsetan í Ukraina, Volodymyr Zelenskyj, fyri at tosa um kríggið í Ukraina og ein møguligan enda á krígnum.
Á fundinum lovaði USA at samstarva við Evropa og veita trygdarváttan til Ukraina.
- Spurningurin er, hvønn tóna klovnurin í Kiev fer at spæla um trygd og øki heima, tá hann aftur er ílatin sín grøna hernaðarbúna, skrivar Medvedev á X.
Medvedev hevur havt ein framstandandi leiklut í russiskum politikki í nógv ár. Hann var forseti í Russlandi frá 2008 til 2012, forsætisráðharri frá 2012 til 2020 og er framvegis tætt við toppin í stjórnini í dag.
Eftir fundin í Hvítu Húsunum mánadagin skulu Zelensky og russiski forsetin, Vladimir Putin, eftir ætlan hittast. Tíð og stað fyri fundin er ikki greitt enn.
Putin var sjálvur gestur í USA, tá hann fríggjadagin hitti Trump á eini hernaðarstøð í Anchorage í Alaska. Kríggið í Ukraina var eisini á skránni her.
Trump hevur sagt seg vera føran fyri at enda kríggið í Ukraina, men higartil hevur einki gjøgnumbrot verið í samráðingunum.
Týsdagin hittast evropeisku leiðararnir í Evroparáðnum og samgonguni hjá teimum stuðlandi at umrøða útlitini fyri friði í Ukraina.
/Ritzau/
