Gunnar Vatnhamar úr Leirvík er íslendskur steypavinnari við Víkingi Reykjavík.
Gunnar spældi allan dystin, tá Víkingur í finaluni á tjóðarleikvølli íslendinga, Laugardalsvøllinum vann 3-1 á KA, ið hevði Jóan Símun Edmundsson á vøllinum allan dystin. Pætur J. Petersen slapp ikki á vøllin fyri KA.
Matthías Vilhjálmsson stútaði Víking framum aftaná hornaspark sjey minuttir undan steðginum. Aron Elís Þrándarson økti til 2-0 aftaná eina geniala frísparkskombinasjón.
Ívar Örn Árnason fekk spenning aftur í uppgerðini, tá hann í 82. minutti minkaði um munin til 1-2, men bert tveir minuttir seinni svaraði Víkingur aftur við málið hjá Ari Sigurpálssyni.
Víkingur Reykjavík eru søguligir. Teir eru fyrsta liðið í Íslandi, ið vinnur steypakappingina fýra ferðir á rað.
Í landskappingini manglar Víkingur Reykjavík bert tvey stig komandi fimm dystirnar fyri at vinna meistaraskapið.
Líkt er tí til, at Gunnar Vatnhamar fer at vinna greipuna í Íslandi.
Aftaná loknan dyst fór Gunnar yvir til 12 leirvíkingar, ið hava ferðast til Reykjavíkar fyri at síggja dystin. Tey høvdu føroysk fløgg við, og tað var hugaligt at síggja á RÚV.
Fyri fyrst ynska vit á in.fo Gunnari Vatnhamar tillukku við steypinum. Tað verður vónandi fyrsta dagin, at vit kunnu ynska honum tillukku við greipuni.
