Hákun West av Teigum og liðfelagarnir í Füchse Berlin spældu í kvøld áttandapartsfinalu í týsku steypakappingini.
Dysturin var á útivølli móti Bietigheim Metterzimmern, ið spælir í aðru bundesligu.
Füchse Berlin vann ein trivaligan 42-33 sigur. Heimaliðið var betur við í fyrra hálvleiki, og í steðginum var Füchse Berlin á odda 19-16.
Hákun var effektivur. Hann skoraði trý mál upp á tríggjar málroyndir.
Füchse Berlin hevur sostatt vunnið seg víðari til fjórðingsfinalurnar. Füchse Berlin er eisini við í millumumfarinum í EHF European League og við í oddastríðnum í bundesliguni, so hetta eru spennandi avbjóðingar.
Komandi leygarkvøld spælir Füchse Berlin útidyst móti Lemgo í bundesliguni.
