Í gjár boðaði HB frá, at Jacob Johansson er givin í felagnum. Áleyparin hevur skorað fýra mál í ár og hevur verið á vøllinum allar 15 landskappingardystirnar higartil. Tó er hann skiftur inn ella út í øllum dystunum.
- Áleyparin Jakob Johansson er givin í HB. Samstarvið millum partarnar er endað í sátt og semju. Vit takka Jakob fyri tíðina í HB og ynskja honum alt tað besta framyvir, skrivaði HB.fo.
HB liggur í løtuni á 2. plássi í landskappingini, er í hálvfinaluni í kappingini um Løgmanssteypið og skal spæla í Evropa í summar. Tó hevur felagið ikki í sinni at finna ein avloysara útifrá.
- Vit hava ikki ætlanir, um at taka nakran inn, sigur Ransin N. Djurhuus, formaður í HB.
Hetta merkir, at ungi og evnaríki Dávid Reynheim verður 2. val í álopinum. Í løtuni hevur HB bara Mikkel Dahl, sum kann roknast sum ein royndur áleypari í hópinum. HB spælir hósdagin toppdyst móti Víkingi í Sarpugerði.
