Kanadiski sangarin og sangskrivarin Neil Young hevur gjørt allan sín tónleik frítt atkomiligan í Grønlandi, skrivar hann á heimasíðu síni.
Hetta ger hann eftir "órættvísa stressið og hóttanirnar", sum grønlendingar, sambært Young, hava verið fyri av amerikanska forsetanum, Donald Trump.
– Eg vóni, at mín tónleikur og mínir tónleikafilmar kunnu lætta um nakað av tí ósakligu strongd og hóttanum, tit uppliva frá okkara ópopuleru og vónandi fyribils stjórn, skrivar hann.
Tí letur Neil Young síni arkiv upp á heimasíðuni, soleiðis at øll, sum hava grønlendsku landakotuna í fartelefonnummarinum, kunnu fáa ókeypis atgongd til meira enn fimm áratíggju av tónleiki frá kanadiaranum í eitt ár.
– Tað er mítt inniliga ynski, at tit kunnu njóta allan mín tónleik í tykkara vøkru grønlendsku heimum í hægstu góðsku. Hetta er eitt tilboð um frið og kærleika, sigur han.
Young hevur áður stríðst við Trump forseta. Í fjør skrivaði Young, sum hevur bæði kanadiskan og amerikanskan ríkisborgararætt, á heimasíðu síni, at hann var bangin fyri, at bersøgnu atfinningar hansara av Trump kundu føra til, at hann verður noktaður atgongd til USA eftir eina ferð í Evropa.
Hann hevur eisini verið bersøgin mótvegis amerikanska podcast-vertinum Joe Rogan, sum stendur aftanfyri eitt av best umtóktu podcastunum á stroymingstænastuni Spotify.
Í 2022 kravdi Neil Young, at allur tónleikur hansara skuldi takast burtur úr Spotify, tí hann var ónøgdur við, at Rogan og gestir hansara høvdu gjørt anti-vaccine pástandir, sum Spotify ikki vildi taka aftur.
Hann kom tó aftur til Spotify í 2024 eftir tvey ára boykott av svensku tónleikastroymingstænastuni.
Neil Young hevur javnan vitjað í Danmark og hevur spælt fleiri ferðir á Roskilde Festivalinum síðan 90-árini.
/Ritzau/
