Í gjár var Javni á stovnsvitjan á Umlættingardeplinum á Sandi, og hetta var í sambandi við, at umlættingin á Frítíðarheiminum nú fer at flyta til Sands.
- Endamálið við vitjanini var at fáa innlit í umstøðurnar og at hava eitt gott og óformelt prát um gerandisdagin á deplinum.
Í Javna siga tey, at tey vórðu møtt av einum blíðum starvsfólkahópi, sum vísti teimum runt í deplinum og greiddu frá.
- Umstøðurnar eru sera góðar, eitt nú kømur, ergonomiskar lyftir á wc, venjingarhølir og eitt rúm við hitapotti.
Á Facebook-vanganum hjá Javna verður sagt, at starvsfólkini á Umlættingardeplinum á Sandi eru spent at taka ímóti teimum, sum fara at brúka umlættingina.
Undir vitjanini fekk Javni kunning um, hvussu tey arbeiða við menning og tillaging í gerandisdegnum.
Prátið kom eisini inn á, hvussu flutningur til og av Sands kann skipast - við fleiri praktiskum og fleksiblum sjónarmiðum og við tí greiða útgangsstøði, at hvørki umlættingin ella flutningur skulu verða ein fíggjarlig byrða fyri brúkarar og avvarðandi.
- Vit vilja takka leiðslu og starvsfólki á Umlættingardeplinum á Sandi fyri at taka so væl ímóti okkum og fyri eitt gott og virðiligt prát, siga tey í Javna eftir stovnsvitjanina í gjár.
