Har gongur alt sína vanligu gongd, undantikið, at Rakul og hjálparfólk fyrireika at flyta nøkur av djórunum úr Fámará, tí tey skulu ikki nýtast ella liggja í klemmu, um løgreglan verður send at at fáa búfólkini í Fámará av festinum.
- Líkasum onnur ikki høvdu nýtt, ella misnýtt síni børn í slíkum stríði, so fara vit heldur ikki at nýta djórini,men flyta tey í trygt umhvørvi, sigur Rakul.
Johan fæst við ymiskt praktiskt, so sum at fáa rættlag á teirra streymveiting, ið hevur havt brek.
Johan tók væl ímóti fólkunum frá Búnaðarstovuni í morgun, sigur hann.
- Men eg var heldur ikki so yvirblíður, so sum onkutíð fyrr, sigur Johan, sum tó leggur afturat, at alt gekk siðiliga fyri seg.
Johan Dalsgaard hevur verið í samband við Fútan og Fiskimálaráðið, og hann væntar ikki, at nakað stórvegis hendir í málinum fyribils, tí málið tykist ikki hava skund.
- Málið skal viðgerast og so er hetta eisini tíðin, tá fólk halda frí, so kanska eru tey ikki væl mannaði at taka sær málinum, sigur Johan.
Men onnur á garðinum eru ikki líka trygg, og eru heldur ivasom, hvørt okkurt ikki kann henda næstu dagarnar. Tí arbeiða tey við at flyta nøkur av djórunum til tryggari støð í Føroyum.
Men ongar ætlanir eru um at fara úr Fámrá.
- Nei, vit ætla okkum ongan veg, staðfesta fókini í Fámará, sum hava kært avgerðina hjá Búnaðarstovuni um at lata øðrum festara festið í Fámará.
Áðrenn kæran er viðgjørd væntar Johan ikki, at løgregla ella onnur, koma til Fámará at gera álvara av ávaringunum um at reka tey av festinum.
