Løgreglan veit ikki, hvor hevur skotið teir seks menninar, ella hví teir vórðu skotnir, men tað líkist mest avrætting og einari uppgerð av einum ella øðrum slagi, sigur løgreglan í Duisburg.
-Vit tosa um seks skotnar menn, sum eru skotnir í høvdið, men vit tosa eisini um fleiri drápsmenn, sigur talsmaðurin hjá løgregluni, Reinhard Pape, við blaðið Die Welt.
Klokkan hálvgum tvey síðstu nátt steðgaði ein maður einum løgreglubili tætt við jarnbreytarstøðina í týska býnum Duisburg. Maðurin segði seg hava hoyrt fleiri skot, og tá løgreglumenninir komu á staðið, funnu teir seks skotnar menn. Fimm teirra vóru deyðir, og tann sætti doyði á veg á sjúkrahúsið.
Nakrir av monnunum lógu deyðir í bilum sínum, og hinir lógu uttan fyri bilarnar. Løgreglan hevur einki sagt um, hvørjir menninir eru, men summar tíðindastovur skrivaðu í dag, at menninir eru svartir, og at talan tí helst var um eina uppgerð millum innflytarar í brotsmannaumhvørvinum.
