Vaktleiðarin á løgreglustøðini visti í morgun at siga, at eingir trupulleikar higartil hava staðist av lýsta verkfallinum hjá arbeiðarafeløgunum.
- Nei, her hevur einki verið higartil. Vit virða sjálvsagt verkfalsrættin, og vit taka tað púra róligt, segði løgreglan í telefonfundinum í morgun.
Spurdur, um løgreglan væntar, at tey fara at fáa brenni á bilarnar, um verkfallið verður drúgt, og pumpurnar á støðunum gerast tómar, er svarið:
- Vit vænta ikki, at hetta verður ein trupulleiki.
Vaktleiðarin visti at siga, at onkur avtala er um, at neyðsendaraakfør, sum eitt nú løgregla, sjúkrabilar og sløkkilið fáa atgongd til brenni.