Fríggjadagin hin 15. november 2013 andaðist bróðir okkara, Jóan Karl Høgnesen, bert 59 ára gamal. Jóan Karl búði tey seinastu 20 árini í suður Onglandi, Newport, saman við konu síni Mariu, sum hann var giftur við í 18 ár. Av og á kom hann heim at vitja okkum, og serliga var tað mammu okkara, ið hann vildi síggja. Hann ringdi altíð til hennara 2 ferðir um vikuna og búði hjá henni, tá hann var her á klettinum. Jóan Karl var næstelstur av okkum 5 syskjum, og elstur av beiggjunum. Jóan Karl átti ein son , sum eitur Ingi.
Øll síni bestu ár var hann sjómaður, hann byrjaði við Stellu Karinu, tá hon kom í 1969, og seinni sigldi hann nøkur ár við skipinum hjá Samvinnufelganum ”Norðalduni,” og við skipinum ”Kvikk” hjá Joensen og Olsen. Eina tíð róði hann út við Havsbrún, sum Olgar Andreasen førdi, og onkrum øðrum báti eisini.
Í 1980 tók hann skiparaprógv, og fór út at sigla sum stýrimaður í farmasigling, Tað bleiv hansara lívsstarv. Hann sigldi eina tíð við føroyskum farmaskipi sum stýrimaður, og seinni eisini fleiri ár við donskum og enskum farmaskipum, bæði sum stýrimaður og eisini sum skipari. Hann var stýrimaður hjá mær í 1986-1987, vit sigldu í timecharter á Miðjaðarhavinum, hann var sera nærlagdur og tryggur á brúnni bæði við navigeringini, sjómannskapi og serstakliga í samskifti á enskum máli. Skemtingarsamur var hann sum fáur, á sín egna hátt, og mangan sótu vit í skellilátri, tá hann greiddi frá onkrari stuttligari hending, ið honum hevði verið fyri. Hann var ein snillingur til at fáa eina keðiliga søgu stuttliga, samstundis kundi hann sita leingi álvarsligur og grunda um dagsins viðurskiftir. Ongantíð, nei, aldrin elvdi hann til klandur, har hann var, og vóru fólk ikki einig í onkrum sjónarmiðum, sum tosað varð um, valdi hann altíð at vera neutralur, og ikki taka part í nøkrum, men sat bert og lurtaði til tosið var liðugt, fyri síðan at venda aftur til skemtunar. Hann elskaði at undirhalda familjuni, og tað dugdi hann eisini sera væl.
Hann kom heim at vitja síðst í juli mánaða fyri seinastu ferð. Týðiliga sá man á honum, at hann var blivin veikur, og at kreftirnar gingu undan. Hann fekk staðfest krabba fyri nøkrum árum síðani, og so líðandi mergseyg henda herviliga sjúkan alla megi úr likami hansara, eins og hendan sjúkan hevur gjørt við so nógv onnur, at hann til endans ikki kláraði meir og andaðist tá hospitalinum í Newport 15. november 2013.
Við hesum fáu orðum vilja vit lýsa frið yvir okkara elskaða son og beigga.
Nú Gamla árskvøldið nærkast, og farið brátt er árið
vit flest øll merkja angan, og gleðast øll til Várið
eg sakni mín bróður av foldum er farin
í minninum stendur tú eftir sum varðin
sum friðsælur fuglur var títt eykennislyndi
tú aldrin til klandur nakrantíð kyndið.
Hvíl í Friði
-----
Mamma og syskini. Selma, Sevilda, Sigmar, Kristian Suni og Kjartan
