Eftir orðaskiftinum í ár at døma høvdu vit roknað við, at teir fara at siga, at hetta hendi í 2007.
Men er hetta vist?
Nógv bendir á, at teir heldur fara at siga, at henda broytingin fór fram í 1923.
Tá løgtingið varð sett á stovn í 1852, varð ásett, at tingmenn vórðu valdir í sjey valdømum. Tey, ið búðu í hesum valdømum, gjørdu sjálvi av, hvør ið skuldi fara á ting at umboða tey.
Í 1923 varð hetta broytt, og Føroyar gjørdist eitt valdømi. Vit høvdu tá fingið politiskar flokkar, og nú vórðu atkvøðurnar til hesar flokkar lagdar saman í eitt tal fyri alt landið, og fingu flokkarnir umboðan á tingi í tann mun, teir høvdu atkvøður í øllum landinum, í hesum eina valdøminum.
Tey fyrrverandi valdømini gjørdust nú uppstillingardømi. Flokkar stillaðu upp listar í teimum, og tær atkvøður, hesir listar fingu, vórðu lagdar saman fyri alt landið. Í fyrstu syftu fingu flokkarnir nøkur umboð í uppstillingardømunum, men var hetta tal ov lítið, vórðu nakrir tingmenn lagdir afturat, og tí kundi tað koma fyri, at ein tingmaður í einum uppstillingardømi kom á ting ikki av tí at tey fólk, sum kendu hann, høvdu valt hann, men av tí at onnur aðrastaðni í landinum høvdu greitt atkvøðu fyri hesum flokki.
Í hesi skipan var ein leivd av tí demokratiska lyndi, sum var í upprunaligu løgtingsvallógini frá 1852.
Nú í 2007 hendir tað, at sjálvt hesin demokratiski snøkil verður burturbeindur. Nú skulu vit ikki longur hava 7 uppstillingardømi, men bert eitt.
Tað er gott klárað at selja hetta undir heitinum av demokratiskum framstigi. Tá verður avgjørt siglt undir følskum flaggi.
