Men líka so stórt var skuffilsið, tá G!Festivalurin fríggjadagin boðaði frá, at Robert Plant hevði avlýst føroyaferðina, tí ágangurin var so stórur, og at at Robert Plant hevði fingið negativa umtalu frá umhvørvisfelagskapinum Blue Planet Society viðvíkjandi grindadrápi.
– Sikkin ein klovn! Tað er tað fyrsta, sum kemur okkum til hugs, tá ein tilkomin maður, sum hevur vitjað bæði einaræðislond, lond sum javnan kríggjast, og lond, sum til dømis drepa stórhval til vinnulig endamál og lond sum til dømis Spania, sum pínir tarvar til deyðis bara til stuttleika.
Og so kemur hann úr einum landi, sum Bretlandi, sum søguliga hevur ført nógv kríggj og ger tað enn og hevur dripið nógv fólk. Hvat er hetta fyri humbukk at hokna fyri einum lítlum ignorantfelagsskapi, sum hevur gjørt sær sum mál at gera Føroyum fortreð – helst eisini bara til stuttleika ella fyri at ríka seg upp og gera seg upp sum Paul Watson og onnur hopphøvd – uttan at hava nakra virðing fyri veruleikanum.
Føroyingar mugu gevast við at bukka undir fyri slíkum tápuligum ágangi. Vit eiga ikki at lata okkum hetta lynda, og allir Led Zeppelin-fjepparar í Føroyum áttu at skrivað til Robert Plant og fortalt honum, hvussu tápuliga hann hevur uppført seg í hesum máli, og at maðurin, sum var ein hetja, ið føroyingar vildu heilsa vælkomnum á G!, nú í eygum føroyinga er ein stórur klovnur, sum ikki torir at hyggja G! fyrireikararnar í eyguni og siga teimum, at hann avlýsir ferðina. Sendir boðbera við við boðunum, sum hann ikki er maður fyri at bera sjálvur.
Vit kunnu altíð spyrja bretar, hvussu nógv menniskju bretska samfelagið hevur dripið, síðani føroyska samfelagið framdi seinasta deyðadómin í 1706.
– Nei, tað kann ikki samanberast, plaga ignorantarnir at siga.
Helst er tað stuttligari at gera friðarfólki í Føroyum fortreð enn at stríðast í móti heimins illgerðarfólki og bølmennum. Vit meina tað – og nakað nógv hugsa tey um bláu planetina...
– Boykottið klovnin Robert Plant og stuðlið G!Festivalinum!
