Republikanarar í Umboðsmannatinginum hava fyrireikað eitt lógaruppskot, sum skuldi geva komandi amerikanska forsetanum, Donald Trump, møguleika at samráðast við Danmark um at keypa Grønland.
Tað siga miðlarnir Fox News og Axios frá.
Fox bar tíðindini fyrst og hevur lógartekstin, sum eitur "Lógin um at gera Grønland stórt aftur".
Fox skrivar, at stuðulin í kongressini er avgerandi fyri Trump, tí hansara komandi stjórn kann ikki keypa fyri samveldisstjórnina uttan góðkenning har.
Lógin um "Ger Grønland stórt aftur" er tann seinasta í fleiri uppskotum til lóg frá republikanarum, sum eru ætlað at loyva Trump at fremja sínar ætlanir.
Eisini er lóggáva gjørd fyri at samráðast um Panamaveitina og umdoypa Meksikanska Flógvan til Amerikaflógvan.
Enn er ikki greitt, nær uppskotið kann koma til atkvøðugreiðslu. Axios skrivar, at tað helst fer at hava brúk fyri demokratiskum stuðli fyri at verða samtykt.
Landsstýrisformaðurin í Grønlandi, Múte B. Egede, hevur áður ført fram, at Grønland ikki er til sølu. Samstundis hevur Mette Frederiksen, forsætisráðfrú Danmark, lagt dent á, at grønlendingar avgera framtíðina hjá Grønlandi.
Donald Trump, sum longu í 2019 í sínum fyrsta forsetaskeiði vísti á ynski um at keypa Grønland, valdi í farnu viku at skerpa munandi sínar áskoðanir um Grønland.
Komandi forsetin upplýsti, at hann ikki fór at útiloka at brúka hernaðarmegi móti Grønlandi.
/Ritzau/
