Tá skuldarbundna flogfelagið SAS miðskeiðis í 2022 søkti um konkursverju í USA, varð roknað við, at tilgongdin fór at taka eitt ár. Nú er næstan tvey ár liðin.
Hinvegin kann felagið fegnast um, at trupulleikarnir eru minkaðir á leiðini, og fríggjadagin rakk SAS enn einum týðandi marki.
ES-nevndin góðkendi soleiðis luttøkuna hjá danska og svenska ríkinum í bjargingini av SAS. Hetta merkir, at tey kunnu stuðla tilsamans 1,3 milliardir evrur, svarandi til 9,7 milliardir krónur.
Sambært Jacob Pedersen, leiðara fyri partabrævagreining í Sydbank, er góðkenningin eitt stórt stig á leiðini at koma úr konkursverjuni.
- Nú liggur bara góðkenningin hjá svenska dómstólinum av rekonstruktiónini, sum skal hoyrast 12. juli. Eftir hetta skuldi tað verið ein spurningur um form fyri at eydnast at koma burturúr konkursverjuni, sigur hann.
Sum partur av umleggingini av felagnum hevur SAS søkt um umbygging í Svøríki.
Tað snýr seg um tær broytingar í partafelagsrættinum, sum eru neyðugar fyri at kunna niðurleggja og avlista gamla SAS og seta nýggja SAS upp við nýggjum eigarum.
SAS hevur áður boðað frá, at felagið væntar at endaliga sleppa úr allari konkurstilgongdini í summar. Skráin kann tó broytast.
Um tað eydnast, fær leiðslan brádliga nógv meira vinning at hyggja eftir tí handilsliga partinum av felagnum.
Konkursvernd og tey mongu parallelu rættarsporini hava verið tíðarkrevjandi. Leiðslan hevur brúkt ógvuliga nógva tíð upp á ymiskar mannagongdir og tilgongdir, sigur Jacob Pedersen.
Tá SAS væntandi er liðugt við sína umlegging, verður tað við nýggjum eigarabólki aftast í talvuni.
Eitt samtak við fýra pørtum fer at seta tilsamans 13,2 milliardir svenskar krónur - slakar 8,6 milliardir danskar krónur - í SAS og harvið yvirtaka ognarrættin.
Í samtakinum eru kapitalgrunnurin Castlelake, flogfelagið Air France-KLM, Lind Invest við danska handilsmaðnninum Henrik Lind á odda og danski staturin.
Við Air France-KLM sum partaeigari broytist SAS frá at vera partur av ferðasamstarvinum Star Alliance til í staðin at melda seg til Sky Team, sum KLM er partur av.
Tað verður frá og við 1. september.
- Eftir hetta skalt tú nýta nýggju møguleikarnar í nýggja samgonguni fyri at skapa eitt enn sterkari inntøkugrundarlag. Og so mást tú byrja at vinna pening.
Hetta er nakað, sum SAS hevur havt tað óvanliga trupult við seinastu árini. Bara seinasta roknskaparárið var tað eitt hall upp á 5,7 milliardir svenskar krónur.
/ritzau/
