Tveir javnleikir – 1-1 á heimavølli ímóti B36 og 3-3 á útivølli ímóti Víkingi – hava kostað B71 nógv í kappingini um at vinna uppflyting í bestu deildina.
Í kvøld eydnaðist tað sandoyingum at vinna fulla úrtøku, tá ið teir høvdu vitjan av næstbesta liðnum hjá EB/Streymi, og úrslitið var 4-2.
Hálvleiksstøðan var 1-0 til EB/Streym, sum legði seg á odda í 34. minutti. Málskjútti var Ábraham Klein Joensen. Hetta var fyrsta málið í ár í næstbestu deildini hjá 22 ára gamla gøtumanninum, sum á triðja ári spælir við EB/Streymi.
Seks minuttir eftir steðgin svaraði B71 aftur, og so gekk tað skjótt.
Sproti úr Dímun javnaði seks minuttir eftir steðgin til 1-1. Hetta var triðju ferð í ár, at Sproti úr Dímun var málskjútti.
Seks minuttir seinni legði Suni Hermans Petersen B71 á odda 2-1, sum fyri aðru ferð í ár var málskjútti í 1. deild. Uppleggið átti Jónatan Kjærbo, og tað var Jónatan Kjærbo, sum í 69. minutti økti um munin til 3-1. Hetta var fyrsta málið hjá honum í 1. deild í ár.
Átta minuttir undan leikloki økti Leonard Londe um munin til 4-1. Bogi Hentze átti uppleggið, og hetta var 12. ferð í ár, at amerikanski álopsspælarin var málskjútti hjá B71.
Í tíðini, sum dómarin legði aftrat, minkaði EB/Streymur um munin til 4-2 við brotssparki. Tað var Ingolf Tvørfoss, sum skoraði úr 11 metrum. Hann flutti undan hesum kappingarárinum úr barndómsfelagnum Víkingi og til EB/Streym, og hetta var fyrsta málið hjá honum í næsbestu deildini, síðani hann fór at spæla við EB/Streymi.
Tað var nýggjur maður í málinum hjá EB/Streymi í kvøld. Jónas á Hædd flutti í summar úr barndómsfelagnum KÍ og til EB/Streym. Áðrenn hann í kvøld fyri fyrstu ferð vardi málið í 1. deild, hevur hann spælt fimm dystir í 2. deild.
B71 er á triðja plássi við 44 stigum. AB, sum er næstfremst við 50 stigum, fær í annaðkvøld vitjan av ÍF.
EB/Streymur er á sætta plássi við 22 stigum.
Næsti dystur hjá EB/Streymi verður 13. september ímóti ÍF á útivølli.
Næsti dystur hjá B71 verður 13. september ímóti NSÍ á heimavølli.
