Gongst soleiðis, sum Kristian Martin Joensen, sýslumaður, væntar, leggur ein grind helst beinini í Sandágerði um eina løtu.
Talan er um eina grind, sum varð funnin í Hestfirði í morgun. Hon gekk suður eftir í fjørðinum og er nú komin heim um Kirkjubønes, eystanfyri.
- Tað hevur eydnast at fáa grindina inn um Kirkjubønes, og nú gongur hon norður móti Havnini, sigur sýslumaður.
Kristian Martin Joensen sigur, at nakrir bátar eru í rakstrinum, men hann heldur, at bátarnir í løtuni eru færri enn 10.
- Gongst, sum ætlað, verður grindin rikin í Sandágerð, sigur hann.
Sýslumaðurin leggur aftrat, at hann nú fer at lýsa grindaøkið at vera ein fjórðing í allar ættir - og eisini uppeftir.
