Sostatt eru bæði Sissal og Jon Hestoy nú stjórar á Føroya størsta grafiska virki.
Sissal er 30 ára gomul og tók prógv sum MSc í altjóða handli frá CBS í 2020. Við setanini av Sissal metir nevndin, at felagið hevur fingið sett nýggjar kreftir við, til eina framhaldandi menning av Føroyaprent og virkisøkjum tess.
Móttøkan var í samband við, at Føroyaprent fylti 20 ár og at stjórin og eigarin hevði rikið egna prentsmiðju í 40 ár.
Á móttøkuni helt skaldið Jóanes Nielsen røðu, sum vit prentaðu her í blaðnum seinasta vikuskifti.
Tey sum vitjaðu inn á gólvið henda dagin, fingu eitt signerað eintak av málninginum „Norrøna og Dettifossur“ eftir Zacharias Heinesen, sum var prentað sum plakat. Eins og Føroya Landsorkestur spældi nøkur løg.
Tað var sannur veitslurómur í prenthøllini á Hoyvíksvegi 59, har fleiri hundrað vinir, kundar og onnur áhugaði vóru komin saman at hátíðarhalda stóru dagarnar.
– Vit eru sera takksom fyri allar heilsanirnar, gávurnar og góðynskini, siga tey á Føroyaprent.