Upprunaliga var ætlanin við rullandi redaktiónini at senda fólk kring landið at heinta tíðindi, fyri síðani at koma til hús aftur at skriva.
Við nýggja redaktiónsbussinum, sum blaðið nevnir »Snoddi«, er ætlanin at verða enn meira aktuell,
Hetta konseptið er nú útbygt – og hevur blaðið innrættað bussin til endamálið. Bussurin skal koyra kring alt landið – og er hann innrættaður við eini skrivstovu, so blaðfólk og myndafólk okkara heit og fjálg kunnu sita í bussinum og skriva, gera samrøður o. s. fr. Við beinleiðis intersambandi í bussinum ber til hjá myndamonnum og blaðfólki at senda tilfarið beinleiðis til Sosialin, so tíðindi fáast í blaðið beinanvegin, og soleiðis at til ber at dagføra heimasíðuna hjá Sosialinum og Portalin beinleiðis úr bilinum.
Tað var William Heinesen, sum segði, at Havnin er heimsins nalvi. Og nú Sosialurin hevur húsast í gomlu handilshúsunum hjá Williami og ætt hansara í Vágsbotni í út við tvey ár, kunnu vit sjálvandi eisini taka orð hansara til okkara, tí vit eru sera fegin um, at tað bar okkum til at flyta blaðhúsið heim í Vágsbotn, tá handilin hjá Valdemar Lützen lat aftur í 2004.
Hóast føroysku fjølmiðlarnir kanska hava ilt við at skilja, at tað er ein verð uttan fyri Havnina, so hava vit á Sosialinum ásannað tað. Júst hetta var orsøkin til, at blaðið stovnaði ”rullandi redaktión”.
Nú landfast er úr Gásadali til Viðareiðis er tað so upplagt, at vit eru meira úti um okkum á meginøkinum allatíðina. Vit fara sjálvandi eisini at vitja sunnanfjørðs, har góðu umstøðurnar í Toyota Hi-Ace bussinum geva okkara fólkum allar møguleikar at verða fyrst við tí síðsta.
Samstundis sum bussurin »Snoddi« verður at síggja kring alt landið, fara teir lítlu bilarnir, »Stavnur« og »Snar« fyri tað mesta at vera sjónligur í meginøkinum.
