Sætta umfar í næstbestu deildini verður seinnapartin.
Fýra tey fremstu liðini hittast í tveimum innanhýsis uppgerðum.
Ósigraða oddaliðið, Víkingur, fær vitjan av ósigraða B68. Hetta er góð styrkisroynd hjá toftamonnum ímóti teimum næstbestu hjá Víkingi. Higartil hevur Víkingur vunnið fýra ferðir á útivølli. Einastu stigini eru mist í einasta heimadystinum, sum var ímóti 07 Vestur. Tá var úrslitið 1-1.
Týskvøldið misti B68 á stokkinum á Svangaskarði, tá ið tað í síðstu løtu eydnaðist HB at javna til 2-2. Hetta var onnur ferðin, at tað endaði 2-2 hjá B68 á heimavølli. Fyrra ferðin var ímóti NSÍ. B68 hevur vunnið allar tríggjar ferðirnar á útivølli.
B36 er á veg inn til Runavíkar. Síðani tepra 1-0 tapið á heimavølli í fyrsta umfari ímóti B68 hevur B36 vunnið fýra dystir og er næstovast. Tað er heilt óhoyrt, at næstbesta liðið hjá árstalsfelagnum skal standa seg so væl í næstbestu deildini.
Einasta NSÍ tapið higartil var á heimavølli ímóti oddaliðnum Víkingi, sum vann 4-2 við Løkina.
Í norðoyastevnudystinum í dag fær KÍ vitjan av HB, sum framvegis ikki hevur vunnið. Tað eru fýra lið úr høvuðsstaðnum í næstbestu deildini. KÍ hevur vunnið ímóti AB, spælt javnt ímóti FC Hoyvík og tapt ímóti B36. HB hevur vunnið tríggjar javnleikir úr fimm teimum fyrstu umførunum – 2-2 týskvøldið á Svangaskarði mundi kennast sum meiri enn hálvur sigur.
Heilt óvæntað er tað, at 07 Vestur ikki enn hevur megnað at vinna fulla úrtøku. Seinnapartin verður AB gestur á Dungasandi. Næstbesta liðið hjá AB hevur ikki enn vunnið nakað stig.
Á vøllinum við Løgmannabreyt fær FC Hoyvík vitjan av B71. Tað er nummar sjey, sum fær vitjan av nummar seks.
KÍ – HB: Jón Tór Baldvinsson kl. 17.15
Víkingur – B68: Rúni Olsen kl. 14.00
NSÍ -B36: Jákup Ø. Mohr kl. 15.30
07 Vestur – AB: Aron Sofus Vest kl. 15.00
FC Hoyvík – B71: Heini Ziskason Viðoy kl. 16.00
Víkingur | 5 | 4 | 1 | 0 | 13 | 5 | 13 |
B36 | 5 | 4 | 0 | 1 | 10 | 5 | 12 |
B68 | 5 | 3 | 2 | 0 | 10 | 5 | 11 |
NSÍ | 5 | 3 | 1 | 1 | 15 | 10 | 10 |
KÍ | 5 | 2 | 1 | 2 | 8 | 10 | 7 |
B71 | 5 | 1 | 2 | 2 | 6 | 8 | 5 |
FC Hoyvík | 5 | 1 | 1 | 3 | 7 | 13 | 4 |
07 Vestur | 5 | 0 | 3 | 2 | 6 | 8 | 3 |
HB | 5 | 0 | 3 | 2 | 6 | 10 | 3 |
AB | 4 | 0 | 0 | 5 | 5 | 12 | 0 |
