Seint í kvøld sigur amerikanski forsetin, Donald Trump, at hann gongur við til at steðga bumbingini av Iran í tvær vikur, um Iran letur Hormussundið uppaftur fyri skipaferðslu í stundini.
Boðini, sum forsetin hevur lagt út á Truth Social, koma eftir, at forsætisráðharrin í Pakistan, Shehbaz Sharif, hevur heitt á Trump um at útseta Iran-freistina í tvær vikur.
- Treytað av, at Iran gongur við til at lata Hormussundið uppaftur - beinanvegin og trygt, góðtaki eg at útseta bumbingina og álop á Iran í einum tíðarskeiði á tvær vikur.
Forsetin leggur aftrat, at hetta verður ein vápnahvíld, sum verður galdandi fyri báðar partar í krígnum.
Donald Trump leggur aftrat, at USA og Iran eru vorðin samd um flestu punktini, sum stríð hevur verið um.
- Eftir boðini, sum amerikanski forsetin hevur lagt út á Truth Social í kvøld, er prísurin á norðsjóvarolju fallin, veit norska kringvarpið - NRK - at siga seint í kvøld.
