Robert F. Kennedy yngri kann fáa ein stóran leiklut í umsitingini hjá Donald Trump, um republikanska forsetavalevnið vinnur valið.
Tað segði Donald Trump fríggjadagin við tíðindafólk í Michigan.
- Hann (Robert F. Kennedy Jr., red.) fer at hava ein stóran leiklut í mun til heilsuverkið. Hann veit meira um tað enn nakar annar, sigur Trump.
Kennedy er løgfrøðingur og umhvørvisverji, men hevur seinastu árini eisini fingið atfinningar fyri at spreiða skeivar upplýsingar um koppsetingar.
Trump legði fríggjadagin afturat, at hann sjálvur tekur undir við nøkrum av sjónarmiðunum hjá Kennedy, men vildi ikki svara spurningum um, hvørt hann var samdur við retorikkinum hjá Kennedy um koppsetingar.
Robert F. Kennedy yngri stillaði upp sum sjálvstøðugt valevni á forsetavalinum, áðrenn hann tók seg aftur í august og boðaði frá stuðli sínum til Trump.
Sambært tíðindastovuni AFP eru leysasøgur um, at 70 ára gamli Kennedy kann vera boð upp á ráðharrasess, um Trump vinnur forsetavalið 5. november.
Gitingar eru eisini um, at hann kundi verið endað sum heilsumálaráðharri.
- Í 19 ár havi eg biðið hvønn morgun uttan undantak um, at Gud skal seta meg í eina støðu, har tað ber til at fáa enda á farsóttini av kroniskum sjúkum, segði Kennedy fríggjadagin á einum av veljarafundunum hjá Donald Trump í statinum Michigan.
Á einum fundi sunnudagin í Madison Square Garden í New York segði Trump, at hann fór at lata Kennedy “ganga amokk í heilsuverkinum.” Forsetavalevnið greiddi ikki nærri frá útsøgnini.
Róbert F. Kennedy yngri er sonur fyrrverandi demokratiska politikaran Robert F. Kennedy, sum varð myrdur í 1968.
Hann er sostatt eisini bróðirsonur fyrrverandi forsetan John F. Kennedy, sum varð skotin til deyðis í 1963.
Stuðul hansara til Trump hevur elvt til vónbrot hjá restini av Kennedy-familjuni. Í kjalarvørrinum av tíðindunum um stuðulin hjá Kennedy til Trump, søgdu fimm av systkjunum hjá Kennedy stuðulin til Trump fyri "svik".
Ritzau/AFP
