- Eg skal hitta Zelenskyj í dag, sigur amerikanski forsetin, Donald Trump, av røðarapallinum í Davos í Sveis.
Sambært norska kringvarpinum NRK, sum endurgevur Reuters, ljóðaði tað á forsetanum, sum um ukrainski forsetin var í salinum.
Men, Volodymyr Zelenskyj er ikki í Davos. Hann er í ukrainska høvuðsstaðnum, Kyiv.
Seinastu mánaðirnar hava umboð fyri USA hitt ukrainskar og russiskar myndugleikar, og málið hevur verið at rokkið einari friðaravtalu.
Fyrr í vikuni hittust umboð fyri amerikanskar og russiskar myndugleikar eisini í Davos.
Donald Trump heldur, at bæði Volodymyr Zelenskyj og Vladimir Putin eru "idiotar", um ein avtala ikki kemur upp á pláss.
- Vit eru lutfalsliga nær einari avtalu, sigur amerikanski forsetin sambært Reuters.
