Tunesiskur politikari dripin framman fyri børnunum
Mohamed Brahmi - ein framstandandi andstøðupolitikari í Tunis - varð í morgun dripin av skotum uttan fyri hús síni í Ariana fyri eygunum á konu og børnum, siga TAP tíðindastovan og tunesiska ríkissjónvarpið.
Brahmi var í leiðsluni á tjóðskaparliga flokkasamtakinum Fólksins Rørslu. Hann fanst alment at islamistisku stjórnini og var ein av limunum á vinstravonginum í ráðnum, sum skal orða nýggja grundlóg.
Mohamed Brahmi varð raktur av 11 kúlum. Vitni siga, at teir báðir ókendu gerningsmenninir rýmdu á motorsúkklu, skrivar TV2.
Ógvusliga drápið fekk í dag túsundtals tunesarar at mótmæla í fleiri býnum og framman fyri innanríkisráðið í høvuðsstaðnum í Tunis. Tey krevja, at stjórnin fer frá.
- Niður við islamistisku stjórnini, er kravið frá teimum mótmælandi.
Stjórnarflokkurin, tann islamistiski Ennahda, fordømir á facebooksíðu síni drápið, sigur dpa tíðindastovan.
Fyri hálvum ári síðan varð ein annar andstøðupolitikari - Chokri Belaid - dripin, og tá vóru eisini mótmæli fleiristaðni í landinum.
Ein ráðharri segði í gjár, at myndugleikarnir hava funnið teir, sum skipaðu fyri, at Chokri Belaid varð dripin.
Skuldseta stjórnina
Systir Mohamed Brahmi skuldsetir stjórnina fyri at standa aftan fyri morðið.
- Ennahda drap bróður mín, sigur Souhiba Brahmi.
Einkjan eftir vælumtókta andstøðuleiðaran, Mbarka Brahmi, sigur, at lógleysa harkaliðið hevur dripið fríu røddina hjá Brahmi - uttan tó at nevna, hvønn hon heldur hava ábyrgdina av drápinum.
Aðalverkfall í morgin
Morgindagurin er ásettur sum sorgardagur fyri Mohamed Brahmi, siga landsins myndugleikar.
Størsta fakfelagið í Tunesia, UGTT, hevur boðað frá aðalverkfalli í morgin, skrivar dr.dk.
Hóast drápsmenninir ikki eru handtiknir enn, er illgruni um, at hernaðarligi islamistar standa aftanfyri.
Islamistiskar atgerðir eru vorðnar alsamt fleiri í Tunis síðan kollveltingina í januar 2011, tá Zine al-Abidine Ben Ali forseti varð frákoyrdur.
Navi Pillay, ST-hákommisserur í mannarættindamálum, fordømir drápið á Mohamed Brahmi og krevur, at málið verður kannað.
- Eg eri skelkað og hørm av tíðindunum um, at Brahmi er dripin, sigur hon í yvirlýsing.
Hon heitir á myndugleikarnar um at seta kanning í verk við fullum gjøgnumskygni, so at tey, sum gjørtu hetta brotsverkið, verða revsað fyri tað.
Myndin: Løgreglan í Tunis í ferð við at kanna bilin hjá myrda andstøðuleiðaranum (foto: Scanpix)
