Enn einaferð veit Reuters at siga, at turkiska tjóðartingið fer at taka støðu til, um landið skal loyva Svøríki at gerast limur í Nato.
Sambært Reuters, sum endurgevur Bloomberg, veit ein kelda í turkiska tjóðartinginum at siga, at viðgerðin av svensku umsóknini byrjar í morgin, týsdagin.
Fyri tíð síðan gjørdist Finnland limur í Nato, og Finnland er soleiðis limaland í verjusamgonguni nummar 31.
Svøríki og Finnland søktu um limaskap samstundis, men tað hevur ikki gingið sum eftir ánni hjá Svøríki at fáa sín limaskap upp á pláss.
Fyri at taka upp nýggj limalond í Nato, skulu øll verandi limalond í verjusamgonguni vera samd um upptøkuna.
Trupulleikin hjá Svøríki er, at tvey av limalondunum, harav Turkaland er annað, hava ligið í buktini og liggja framvegis í buktini fyri svenskum limaskapi.
