HSF skrivar:
- U18-Menn - Fingu oyrini í íslendsku maskinuna
Tað var tætt eina løtu, men tá íslendingar settu ferð á, var einki at gera. Ísland vann ein tryggjan 40-28 sigur.
Dysturin var sum so avgjørdur í steðginum. Tá var støðan 23-14 til Ísland, og teir skoraðu upp á nærum allar kjansir framman fyri málinum. Tað kundi sæð øðrvísi út. Í byrjanini av dystinum var tað púra javnt millum liðini. Tað var høg leikferð, og bæði liðini avgreiddu álopini skjótt. Eftir eina lítla løtu byrjaðu útvísingar at fella til liðini. Hetta fingu føroyingarnir ikki gagnnýtt líka væl sum íslendingar. Serliga tá vit spældu sjey ímóti fimm, blakaðu vit tveir bóltar í hendurnar íslendingum. Tá gjørdist munurin størri og størri sum fyrri hálvleikur fór.
Føroyar gjørdu nógv mistøk sum íslendingar revsaðu hart. Íslendingar skulu ikki brúka nógva orku til fleiri av teirra málum, og verjan hjá teimum var stinn í longum løtum. Føroyar royndu seg við sjey ímóti seks í álopinum, og hetta var við misjavnari úrtøku. Okkurt gott, og okkurt minni gott. Eitt av ljóspunktunum í fyrra hálvleiki var Teitur Hellisdal Poulsen, sum var púra tryggur tá hann fekk bóltin á vonginum.
Tað var greitt at hetta fór at verða ein trupul dystur. Boas Ellefsen á Skipagøtu, sum skoraði 11 mál í dystinum í gjár sat uttanfyri allan dystin. Tað sama gjørdi Micah Wardum.
Seinni hálvleikur var javnari enn fyrri. Tað vóru eisini góð ting at byggja víðari á, í hesum dystinum. Millum annað kann nevnast at Brandur Debes Dánjalsson kom inn í seinna hálvleiki og skoraði sjey mál. Skrivar HSF.
Málskjúttar hjá Føroyum:
Brandur Debes Dánjalsson 7
Teitur Hellisdal Poulsen 6
Gabriel S. Árnason 3
Jóan Petur Mortensen 2
Ragnar Heinason 2
Rani R. Johannesen 2
Teitur Bogason 2
Hugin Halgirsson 2
Jónas Fossabrúgv 1
Axel Holm Simonsen 1
