Tað búgva bert 3,4 miljónir fólk í lítla suðuramerikanska landinum Uruguay. Kortini hevur landið støðugt seinastu øldina gjørt vart við seg við góðum úrslitum og avrikum í altjóða fótbólti.
Og "Celeste", sum fótbóltslandsliðið hjá Uruguay verður nevnt hevur eina bjarta framtíð. Í nátt føroyska tíð vann Uruguay suðuramerikanska meistaraheitið fyri U-20 landslið. Talan er um áttandi ferð, at Uruguay vinnur suðuramerikanska meistaraheitið fyri U-20 landslið. Tó er hetta fyrstu ferð síðani 1981, at Uruguay vinnur hesa kappingina.
Uruguay vann avgerandi dystin á tjóðarleikvøllinum í Quito í Ekvador 2-1 yvir vertunum. Samstundis tapti nærmasti kappingarneytin í finalubólkinum, Venesuela 0-2 ímóti Argentina. Ein dystur, sum var spældur fyrr á degnum í Quito í Ekvador. Kolumbia og Brasil spældu javnleik 0-0.
Joaquín Ardaiz gjørdist stóra hetjan hjá Uruguay við at skora bæði málini ímóti Ekvador. Bæði málini hjá Uruguay komu fyrstu 25 minuttirnar av dystinum. Uruguay var á odda 2-0 í steðginum.
Endaliga støðan í finalubólkinum gjørdist hendan :
1. Uruguay +5 12 stig
2. Ekvador +3 7 stig
3. Venesuela +2 7 stig
4. Argentina -3 7 stig
5. Brasil 0 6 stig
6. Kolumbia -7 2 stig
Uruguay, Ekvador, Venesuela og Argentina hava vunnið seg til U20 heimsmeistaraheitið, sum verður í Suðurkorea, dagarnar frá 20. mai til 11. juni í ár.
