Nashville Nights er partur av einum altjóða danskt-amerikanskum konsertkonsepti, sum byggir brúgv millum Nashville og norðurlendska tónleikapallin. Í einum Writers Round sita artistarnir saman á pallinum, skiftast um at framføra sínar sangir og fortelja søgurnar aftan fyri teir.

Áhoyrararnir kunnu tí vænta eitt nærverandi og persónligt kvøld við sterkum sangum, áhugaverdum søgum og humori - júst soleiðis, sum tað verður upplivað í Nashville.

Føroyska countrysongkvinnan Kristel Lisberg stendur fyri at skipa tiltakið í Føroyum. Hon hevur í fleiri ár ferðast til Nashville, har hon hevur skrivað og innspælt tónleik saman við amerikanskum sangskrivarum og framleiðarum. Við Nashville Nights ynskir hon at geva føroyskum áhoyrarum ein smakk av tí serligu sangskrivaramentanini, sum Nashville er kent fyri.

Blue Foley er Grammy-tilnevndur sangskrivari, artistur og framleiðari og er stovnari av Nashville Nights. Hann hevur meira enn 20 ára royndir í Nashville og hevur fingið yvir 250 sangir innspældar av øðrum artistum.

Eric Erdman er amerikanskur sangskrivari, guitaristur og troubadour, kendur fyri sín sterka frásøguhátt og humor. Sangir hjá honum eru millum annað innspældir av The Red Clay Strays.

Saman skapa tey eitt kvøld, har føroyskur og amerikanskur countrytónleikur møtast, og har sangirnir, søgurnar og menniskjuni aftan fyri teir eru í miðdeplinum.

Nashville Nights verður í OY leygarkvøldið 19. september.