Amerikanski forsetin, Donald Trump, lovar nú at gjalda øllum vaksnum amerikanskum ríkisborgarum 5.000 dollarar, um Republikanararnir vinna meirilutan í bæði Umboðsmannatinginum og Senatinum á miðskeiðsvalinum í november.

Tað segði hann í eini røðu á flokstinginum hjá Republikanarunum í Dallas í Texas.

– Um Republikanararnir vinna Umboðsmannatingið og amerikanska Senatið, fari eg, vegna okkara stóru búskaparligu framgongd, at gjalda øllum vaksnum ríkisborgarum í USA eitt vinningsbýti á 5.000 dollarar, segði Trump sambært Reuters.

Hann setti eisini eina treyt fyri nýtsluni av pengunum:

– Einasta treytin, eg seti, er, at vinningsbýtið, vit gjalda út, skal brúkast í USA.

Enn er ógreitt, hvussu útgjaldið skal skipast. Fleiri miðlar vísa eisini á, at ógreitt er, um eitt slíkt útgjald yvirhøvur er lógligt.

Lyftið kemur, meðan Trump roynir at savna flokkin undan miðskeiðsvalinum. Republikanararnir hava vánaligar valforsagnir, lítla undirtøku og vaksandi ónøgd við kríggið í Iran at dragast við.

Eyka flokstingið, sum verður hildið 9. og 10. september, hevur fingið heitið „Trump-A-Palooza“. Sambært AP er hetta fyrstu ferð, at Republikanararnir skipa fyri einum landsumfatandi flokstingi undan einum miðskeiðsvali.

Málið er at fáa veljararnar hjá Trump á val, hóast forsetin ikki sjálvur stendur á atkvøðuseðlinum.

– Eg biði tykkum lata sum um, at eg eri á atkvøðuseðlinum – eg eri á atkvøðuseðlinum, eg eri á atkvøðuseðlinum – bara eina ferð afturat, segði hann sambært AFP.

Trump ávaraði eisini um avleiðingarnar, um flokkurin tapir.

– Um vit tapa, missa tit tykkara mark, tit missa tykkara skattalættar, tit missa tykkara trygd og tryggleika, segði hann sambært AFP.

Sambært eini valforsøgn hjá Decision Desk HQ standa Demokratarnir til at vinna meirilutan í bæði Umboðsmannatinginum og Senatinum, skrivar AFP.

Lyftið kann gerast sera kostnaðarmikið. Við støði í amerikanskum fólkatølum frá 2024 hevði eitt útgjald á 5.000 dollarar til hvønn vaksnan amerikanskan ríkisborgara kostað umleið 1.230 milliardir dollarar. Við krónutalinum í Ritzau-tíðindunum svarar tað til umleið 7.850 milliardir krónur. Endaliga upphæddin veldst tó um, hvørji verða fevnd av skipanini.

Kelda: Ritzau