Tvøroyrar kommuna hevði 1.699 íbúgvar 1. august í ár. Árið fyri vóru teir 1.735. Tað er ein minking á 36 fólk, ella 2,1 prosent, og størsta afturgongdin í tali millum føroysku kommunurnar.

Ein samanlegging av mánaðartølunum hjá Hagstovuni fyri august 2025 til juli 2026 vísir, at innlendis flytingarnar viga tyngst í afturgongdini.

Innlendis flytingarnar góvu kommununi eitt samlað tap á 33 fólk. Hinvegin góvu flytingarnar til og úr útlondum eitt avlop á sjey. Tilflytingin úr útlondum var 50, meðan fráflytingin til útlond var 43.

Í sama tíðarskeiði vórðu 11 børn fødd, og 21 fólk doyðu. Burðaravlopið var sostatt minus 10. Saman við flytingunum gevur tað eina samlaða minking á 36 fólk.

Størsta afturgongdin í tali var á Tvøroyri, har fólkatalið minkaði við 16, niður í 851.

Í Ørðavíkslíð minkaði tað við 14, úr 59 niður í 45. Tað svarar til nærum fjórðingin av íbúgvunum har.

Í Trongisvági vóru átta færri íbúgvar, meðan fólkatalið í Froðba var óbroytt. Í Ørðavík vóru tvey fleiri.